Clwb Bowlio Rhodfa’r Dwyrain  

Yn ystod hydref 2019, cychwynnodd Clwb Bowlio Rhodfa’r Dwyrain (Y Rhyl) ar raglen wella ar ac oddi ar y lawnt.

Cynhyrchwyd cynllun datblygu clwb yn nodi cyfleoedd cymryd rhan ynghyd ag uwchraddio'r pafiliwn, oedd ei angen yn fawr. Lluniwyd cynlluniau, ymgynghorwyd ag aelodau'r clwb, defnyddwyr y gymuned ac ysgolion ynghylch anghenion blaenoriaeth; ymgynghorwyd â Chyngor Sir Ddinbych fel perchennog y tir / adeiladau a chafwyd dyfynbrisiau ar gyfer y costau datblygu. Y dasg nesaf oedd nodi a sicrhau cyllid allanol i helpu i gwrdd â diffyg ariannol y clwb ar gyfer y prosiect.

Arweiniodd perthynas oedd wedi’i sefydlu gyda gweinyddwyr Cronfa Gymunedol Gwynt y Môr at drafodaethau dros y Gaeaf yn 2019-20 a’r penllanw oedd cais am grant yn cael ei gyflwyno i’r gronfa ym mis Mawrth 2020. Fe drodd y canlyniad llwyddiannus yn sur yn fuan iawn wrth i Covid daro!

Daeth cynlluniau mawreddog i gyflwyno rhaglen ysgolion a denu chwaraewyr iau newydd i ben dros nos. Cafodd y dyddiadau dechrau ar gyfer adnewyddu’r pafiliwn eu rhoi o’r neilltu gyda’r gwaith adeiladu wedi’i ohirio ar unwaith hefyd. Bu cur pen dechrau a stopio am yn ail, ynghyd â chostau materol cynyddol, yn her wirioneddol i swyddogion y clwb drwy gydol 2020, gyda rheolwr y prosiect yn rhoi gwybod i staff Gwynt y Môr am yr oedi. Roedd cael sicrwydd a hyblygrwydd o ran amserlen gan y cyllidwyr yn galonogol iawn yn ystod y cyfnod hwn.

Ym mis Gorffennaf 2021, bedwar mis ar ddeg yn hwyrach na’r disgwyl, agorodd pafiliwn y clwb, sydd wedi gwella’n fawr, ei ddrysau i aelodau a’r gymuned leol unwaith eto. Roedd y clwb yn cael ei ddefnyddio eto! Roedd y bowlwyr yn ymhyfrydu yn eu hamgylchedd newydd a gwell, ac yn ddiolchgar am y cyfle i gyfarfod eto yn y clwb a rhannu straeon a phrofiadau wrth fwynhau eu camp a'u hangerdd dros fowlio unwaith eto.

Mae'r clwb yn edrych ymlaen at 2022 llawer gwell; ond beth am y rhaglen ysgolion? Wrth i’r genedl gyfan ddod allan o Covid ac wrth i nifer yr achosion o Omicron ddechrau pylu, mae cynlluniau’n cael eu hail-greu eto i fynd i ysgolion y gwanwyn yma, i ddod o hyd i’n cenhedlaeth nesaf o fowlwyr a’u meithrin a chadw traddodiadau’r clwb gwych yma yn fyw.