Ty Gobaith
Dyfarnwyd £75,000 i Tŷ Gobaith tuag at estyniad i greu ystafell gymorth diwedd oes bwrpasol ar gyfer yr hosbis yn haf 2024.
Cyfanswm y costau adeiladu oedd £592,546 ac roeddent yn cynnwys y prif gostau adeiladu, adnewyddu'r adeilad presennol, gwaith allanol yn ogystal ag offer a gwaith rhagarweiniol.
Bydd y gofod newydd mwy a'r cynllun hyblyg yn cael effaith gadarnhaol ar ddiogelwch, urddas a chysur i bawb drwy ddarparu profiadau gofal gwell i blant a phobl ifanc â chyflyrau cymhleth, lliniarol ar ddiwedd oes.
Mae'r gofod newydd yn cynnig mwy o breifatrwydd, annibyniaeth a chysur yn ystod yr amseroedd anoddaf hyn, gyda'r hyblygrwydd i ddarparu ar gyfer gwahanol sefyllfaoedd teuluol. Bydd hyn yn cael ei fesur drwy gasglu adborth anffurfiol gan deuluoedd (sylwadau, cardiau, e-byst) a thrwy gyfweliadau teuluol.
Mae'r estyniad yn darparu lle ychwanegol fel y gellir gofalu am 2 o blant/teulu ar ddiwedd oes. Yn flaenorol, dim ond i un plentyn ar y tro yr oeddent yn gallu cynnig hyn.
Mae'r tîm gofal wrth eu bodd gyda'r estyniad, yn enwedig gyda maint y gofod newydd, ei olygfa, yr hyblygrwydd y mae'n ei ganiatáu, yr ardaloedd clinigol pwrpasol a'r mannau awyr agored.
Yn y tymor byr, mae'r prosiect eisoes wedi cael effaith bwerus ar o leiaf un teulu a ofynnodd, gan wybod am y gwaith adeiladu sy'n digwydd, am daith o amgylch yr estyniad a'r cyfleusterau newydd y maent yn gwybod y bydd angen iddynt eu defnyddio rywbryd.
Mae gweld y gofod ffisegol lle bydd diwedd oes yn digwydd yn y pen draw yn gam arall yn y daith o dderbyn prognosis eu plentyn a gall helpu teulu i oresgyn eu hofnau a'u pryderon, gan gefnogi proses iachach o alar disgwyliedig.
Yn ein diwrnod agored diweddar, mynychodd nifer o weithwyr meddygol proffesiynol o bob cwr o ogledd Cymru, ynghyd â'n tîm gofal ein hunain.
Cadarnhaodd y rhai a gymerodd ran yn yr arolwg diwrnod agored fod y cyfleusterau newydd yn cynnig amgylchedd gwaith mwy diogel a gwell, sy'n cyfarparu staff yn well i ddarparu gofal clinigol effeithiol.
Diolch yn fawr iawn i ymddiriedolwyr Sefydliad Cymunedol Gwynt Y Môr am eich grant hael ac i'r tîm yn CVSC am ein cefnogi gyda'r broses ymgeisio. Bydd y prosiect hwn yn helpu i sicrhau bod plant â chyflyrau sy'n cyfyngu ar fywyd o bob cwr o ogledd Cymru yn derbyn gofal lliniarol o'r radd flaenaf yn eu cymuned.